დავიწყება უბრალო სიტყვაა,
ადვილად სათქმელი:
დაივიწყე.
ჰკითხეთ თვალებს:
შეუძლიათ უკანვე ჩაიბრუნონ, რაც დაინახეს?
ნუ დაიჯერებთ რომ დრო მკურნალია.
ტანსაცმელი ასე იშორებს ლაქებს –
რეცხვიდან რეცხვამდე იცრიცება,
თითქოს ქრება.
მეხსიერება უფრო ვერაგია –
რასაც ივიწყებს, იმასაც ინახავს.
გაქცევა ვერ გიშველის
თუკი გზაც მდინარეა –
ჩრდილების და აჩრდილების.
დუმილიც მკვლელია,
სიცოცხლის ხმები მიაქვს
და
მარტოობაც მატყუარა,
თუკი ცდილობს დაგაჯეროს,
რომ გადარჩა.

ნატო ინგოროყვა